Fréttir

Prentuð dagskrá liggur fyrir í Hannesarholti og eins er velkomið að senda hana í pósti ef óskað er. Dagskrá er birt með fyrirvara um breytingar og viðbætur. Miðasala á viðburði er alla jafna á tix.is Veitingastaður Hannesarholts er opinn fyrir viðburði og einnig fimmtudags-, föstudags- og laugardagskvöld, auk þess sem hann er opinn í hádegismat alla virka daga nema mánudaga og helgardögurð laugardaga og sunnudaga. Kaffi og heimabakað meðlæti alla daga. 

Þeir sem til þekkja vita að Hannesarholt stendur fyrir uppbyggilegu menningarstarfi af ýmsum toga í samvinnu við samborgara, fræðimenn og listamenn. Húsið er 103 ára gamalt og var heimili í 92 ár, þar með talið heimili Hannesar Hafstein síðustu æviárin. Undanfarin ár hefur Hannesarholt hýst sýningar fjölda myndlistarmanna, ungra sem aldinna, nýgræðinga jafnt sem meistara, en í Hannesarholti er ekki hefðbundinn sýningarsalur, hins vegar fá myndir að hanga á veggjum gamalla stofa veitingahúss og víðar, alla jafna í fjórar vikur í senn í bland við aðra menningarstarfsemi. 

Af gefnu tilefni skal bent á að lýsingin á sýningu Þrándar Þóroddssonar sem Hannesarholt fékk í hendur er eftirfarandi: “Borgarlandslagið er sem fyrr í fyrirrúmi á þessari sýningu, í bland við mannlífslýsingar, kyrralífsmyndir og portrett af vinum listamannsins. Afhjúpuð verður mynd af stórbóndanum og rokkstjörnuni Prins Póló, en þeir Þrándur unnu náið saman í áraraðir, og verður prinsinn sérlegur heiðursgestur á sýningunni.“ Þetta segir allt um efni sýningarinnar.